निर्वाचनलाई कसैले पनि रोक्न सक्दैन :प्रचण्ड

पोखरा, २९ चैत ।
एकीकृत नेकपा माओवादीका अध्यक्ष पुष्पकमल दाहाल प्रचण्डले अब हुने संविधानसभा निर्वाचनलाई कसैले रोक्न नसक्ने बताउनु भएको छ । क्रान्तिकारी पत्रकार संघ पोखराले आज गरेको पत्रकार भेटघाट कार्यक्रममा उहाँले माओवादी लगायतका केही दललाई चुनाव नचाहने प्रतिक्रियावादी शक्तिले उचालेको बताउँदै उनीहरुले निर्वाचनको गतिविधिमा अवरोध गर्न उक्साएको आरोप समेत लगाउनुभयो ।

उहाँले बैद्य माओवादीलाइ सहमतिमा आउन आग्रह गर्दै सहमतिमा नआए जनताले नै ठेगान लगाउने चेतावनी दिनुभयो । यसैबिच, विश्वले चिन्नेछ नेपाल अभियान आजबाट सुरु भएको छ ।

विश्वकै इतिहासमा सबैभन्दा लामो टक शो गरिने अभियानको एकीकृत माओवादीका अध्यक्ष पुष्पकमल दाहाल प्रचण्डले उद्घाटन गर्नु भएको छ ।
कार्यक्रमको उद्घाटन गर्दै प्रचण्डले नेपाललाई विश्वमा चिनाउन बुद्ध नेपालमै जन्मेका हुन र सगरमाथा नेपालमै पर्छ भन्ने मात्र नभएर नेपाल प्राकृतिक श्रोत साधनको अपार खानी हो भनेर पनि चिनाउन आवश्यक रहेको बताउनु भयो ।

उहाँले केही महिना भित्रै निर्वाचन हुने भएकाले चुनावको तयारीमा होमिन सबैलाई आह्वान गर्नु भएको छ । उहाँले चुनावबाटै निकास हुने भएकाले छिटो भन्दा छिटो चुनाव हुनुपर्ने बताउनुभयो ।